गुल्मी – परराष्ट्र मन्त्री प्रदीप ज्ञवालीको नक्कली धन्दा छताछुल्ल भएको छ । उनले जनतालाई कोरोना भाइरसको संक्रमणबाट जोगाउन छिटो परिक्षण होस भन्नका लागि किनेर नगरपालिकालाई हस्तान्तरण गरेको मेसिन नक्कली भएको पाइएपछि उनको नक्कली धन्दा छताछुल्ल भएको हो ।

जनतालाई काम गरेको देखाउनका लागि हेलिकप्टरमा ल्याएर तामझामका साथ हस्तान्तरण गरेको मेसिन नक्कली देखिएपछि मन्त्री ज्ञवालीले जनताको आँखामा छारो हालेको अर्थमा विश्लेषण गर्न थालिएको छ । उक्त मेसिन अहिले काठमाडौं फिर्ता पठाइसकिएको छ । मन्त्री ज्ञवालीले कामै नलाग्ने मेसिन ल्याएको र मर्मत गर्ने अनेक प्रयास गर्दा पनि नभएपछि मेसिन नै काठमाडौ फिर्ता गरिएको श्रोतको दावि छ ।

झण्डै एक महिना लगाएर पनि बनाउन नसकिने अवस्थाको मेसिन गत साउन ३ गते भव्य कार्यक्रम गरेर जिल्ला सदरमुकाम रहेको रेसुङ्गा नगरपालिकालाई हस्तान्तरण गरिएको थियो । हस्तान्तरणपछि प्रयोगमा आउला भनेर प्रतिक्षा गर्दा गर्दै आम नागरिक निराश भएपछि सोधिखोजी गर्दा विग्रिएको, पाटपुर्जा नै नभएको र काम नलाग्ने मेसिन ल्याएर दिएको पुष्टि भएको हो ।

मन्त्रीले दिएको मेसिन प्रयोगमा नल्याएको भन्दै जनताले शुरुमा नगरपालिकाका मेयर डिल्लीराज भुसालप्रति आक्रोश व्यक्त गरेका थिए । तर मन्त्रीले काम नलाग्ने मेसिन दिएकाले आफुले प्रयोगमा ल्याउन नसकेको जवाफ उनले दिने गरेका थिए । उनले पाटपुर्जा पुरा नै नभएको मेसिन ल्याइदिएकाले आफूले गाली खानु परेको भन्दै मन्त्री ज्ञवालीसँग पनि आक्रोश पोखेका थिए ।

मन्त्री ज्ञवालीले दिएको भनिएको सो पिसिआर मेसिनका लागि दुई नगरपालिकाबाट ३० लाख र दश गाउँपालिकाबाट एक करोड गरी कुल एक करोड तीस लाख रकम संकलन गरिएको थियो ।

जनतालाई काम देखाउन र कामको श्रेय लिन मन्त्री ज्ञवाली स्वयम उक्त पिसिआर मेसिन काठमान्डौदेखि हेलिकेप्टर मार्फत् सदरमुकाम तम्घास ल्याएका थिए । मेसिन जडानको लागि रेसुङ्गा नगरपालिकालाई जिम्मा दिइएको थियो । तर नगरपालिकाले उक्त मेसिनलाई चाहिने विभिन्न उपकरणहरु नभएको कारण देखाउँदै सञ्चालनमा ल्याउन नसकेको बताएको थियो ।

पुरा पाटपुर्जा नै नभएको मेसिन बनाउनका लागि नगरपालिकाले शुरुमा प्रदेश जनस्वास्थ्य प्रयोगशाला भैरहवा र त्यसपछि काठमाडौबाट स्वास्थ्य प्राविधिकहरुको टोली ल्याएको थियो ।
ती सवै प्राविधिकहरुले पिसिआर मेसिनमा अत्यावश्यक पाटपुर्जाहरु नै नभएकाले यो मेसिन काम नलाग्ने र यहाँ बनाउन पनि नसकिने भएकाले काठमाडौ फिर्ता गर्नु भनेर सुझाव दिएका थिए ।

अपुरो मेसिनलाई गुल्मीमै मर्मत गर्ने प्रयास एक महिनासम्म पनि सफल नभएपछि केही दिन अगाडि मन्त्री ज्ञवालीका स्वकिय सचिव जंग नेपालीले सो मेसिन काठमाण्डौ लगेका छन् । रेसुङ्गा नगरपालिका मेयर भुसालले गुल्मीमै मर्मत गर्न नसकिएकाले मेसिन काठमाडौ फिर्ता गर्नुपरेको बताए ।

उनले प्राविधिक र उपकरणहरु उपलब्ध भएमा पिसिआर मेसिन फेरी गुल्मी ल्याएर संचालन गर्न अझै १५ दिन लाग्न सक्ने जानकारी दिए । जिल्ला अस्पतालका मेडिकल सुपरिटेन्डेन्ट उत्तम पच्याले पनि प्रदेश जनस्वास्थ्य प्रयोगशाला भैरहवा र काठमान्डौबाट आएको स्वास्थ्य प्राविधिकहरुको टोलीले आवश्यक पर्ने उपकरणहरु नभएको भनेकाले त्यो मेसिन काठमान्डौ पठाईएको बताए । उनले अब त्यही मेसिन आउँछ की अर्को मेसिन आउँछ भन्ने बारेमा आफुलाई जानकारी नरहेको जवाफ दिएका छन् ।

त्यसैगरी जिल्ला विपद् व्यवस्थापन समितिका अध्यक्ष समेत रहेका प्रमुख जिल्ला अधिकारी भरत कुमार शर्माले पनि मेसिनमा विभिन्न पाटपुर्जा जडान गर्न काठमाण्डौ पठाईएको पुष्टि गरेका छन् । मन्त्री ज्ञवालीले काम नलाग्ने मेसिन तामझामका साथ दिएको देखाएर जनताको भावना र विश्वास माथी खेलवाड गरेको काँग्रेसको टिप्पणी छ ।

काँग्रेसका जिल्ला सचिव खिलध्वज पन्थीले जनताको रकमबाट मन्त्री ज्ञवालीले नक्कली पिसिआर मेसिन किनेर जनता ठग्न खोजेको टिप्पणी गरेका छन उनले कम्युनिष्टहरु कामभन्दा प्रचार बढी गर्छन र सेवाभन्दा स्वार्थ हेर्छन भन्ने पुष्टि भएको दावी गरे
मन्त्रीले नै हेलिकोप्टरमा ल्याएर अत्यधिक प्रचारप्रसारका साथ हस्तान्तरण गरिएको मेसिन काम नलाग्ने रहेको थाहा पाएपछि जिल्लावासी अहिले निराश भएका छन् भने देशैभरी चर्चाको विषय बनेको छ ।