अनलाइन जुवाको कनेक्सन खोज्दै प्रहरी करोडौंको कारोबार गर्ने पिन्टु र रामविलाश को हुन् ?

काठमाडौं – अहिलेसम्म प्रहरीले अनलाइन जुवामा भेटाएको सबै भन्दा धेरै रकम हो। बुधवार काठमाडौं उपत्यका अनुसन्धान कार्यालयले गरेको पत्रकार सम्मेलनमा कार्यालयका प्रमुख एसएसपी मनोज केसीको भनाइ हो रहेको छ।

वान एक्स बेट’ बाट बेटिङ गर्ने पाँच जनालाई पक्राउ गरेपछि प्रहरीले पत्रकार सम्मेलन गरको थियो। पक्राउ परेको समूहले विभिन्न माध्यमबाट ७४ करोड १३ लाख रुपैयाँको कारोबार गरेको प्रारम्भिक अनुसन्धानमा देखिएको छ। रकमको परिमाण अझै बढ्ने प्रहरीको आकलन छ।

गिरोहका नाइके कैलाली घर भएका २९ वर्षीय दिनेश खड्का देखिएका छन्। विभिन्न बैंक खाताबाट उनले ६४ करोड रुपैयाँको कारोबार गरेको तथ्य प्रहरीले सार्वजनिक गरेको छ। उनले रामविलास थारु, तेजबहादुर कठायत, नवीन चौधरी, अनिता धितालको कागजपत्र प्रयोग गरेर ६३ वटा बैंकमा खाता खोलेको फेला परेको छ। १२ वटा बैंकबाट ६४ करोडको कारोबार भएको प्रहरीले भेटाएको जनाएको छ।

यही प्रकरणमा दीपेश श्रेष्ठ, दिनेश चन्द र आशिष लामिछाने पनि समातिएका छन्। दीपेशले ५ करोड ५४ लाख ६६ हजार रुपैयाँ, दिनेश चन्दले प्रभु बैंकबाट ४५ लाख र आशिष लामिछानेले विभिन्न बैंकको खाताबाट २ करोड ९८ लाख ९६ रुपैयाँ भन्दा बढीको कारोबार गरेको खुलेको छ। उनीहरुसँग ७४ करोड १३ लाख ५० हजार रुपैयाँको कारोबार भएको देखिएको छ।

एसएसपी केसीले यो प्रकरणबारे अनुसन्धान दुई महिना अगाडिदेखि नै सुरु भएको बताए। पुष्टि गर्न सकिने प्रमाण संकलन भएपछि मात्र अभियुक्तहरु पक्राउ गर्न सफल भएको उनले बताए। उनीहरुको संलग्नता अनलाइन जुवामा भएको सूचना पाएको थियो प्रहरीले। त्यसैको आधारमा धेरैजना अनुसन्धानको घेरामा परेका थिए। यसपटक भने साना जुवाडेभन्दा ठूलासम्मै पुग्ने योजनाका साथ अनुसन्धान अगाडि बढेको थियो।

सुरुमा नेपालमा बसेर वानएक्स बेटमार्फत सट्टेबाजी गर्ने ३४ जनाको लिष्ट प्रहरीले तयार पार्‍यो। जसमा १ लाख रुपैयाँदेखि माथिका अनलाइन जुवा खेलाउनेहरुको नाम थियो। अहिले पनि प्रहरीसँग ३४ जनाको नामको सूची छ, जसलाई प्रहरी ‘डिस्क्लोज’ गर्न चाहेको छैन। थप अनुसन्धान गरेर उनीहरुलाई पनि कानुनी दायरामा ल्याउने प्रहरीको तयारी छ। धेरै जनामाथि अनुसन्धान गरेपछि हामी करौडौंको कारोबार गर्नेसम्म पुगेका हौं,’ एसएसपी केसीले भने।

प्रहरीले सुरुमा अनुसन्धान गरेका ३४ जनाको ‘कनेक्सन कतै न कतैबाट दिनेशसँग ठोकिन पुगेको थियो। उनीहरुको नाममा अनलाइन जुवा खेलाउन प्रयोग हुने आइडी समेत दिनेशले प्रयोग गर्ने गरेको देखियो। त्यसपछि प्रहरीको अनुसन्धान घेरा ३४ बाट २३ जनामा साँघुरिएको थियो। त्यससँगै उनीहरुले विभिन्न बैंकमा खोलेका खातामाथि प्रहरीले अनुसन्धान गरिरहेको थियो।

२४ जनामाथि अनुसन्धान गर्दा प्रहरीले १० करोडको कारोबार गर्ने पिन्टु नाम गरेका व्यक्तिमा नजर गाड्यो। कैलालीको एक बैंकमा खाता खोलेर १० करोड रुपैयाँको कारोबार भएको भेटिएको थियो। प्रहरीले कैलालीसम्म पुगेर पिन्टुको बारेमा अनुसन्धान गरे पनि उनी कतै फेला पार्न सकेनन्। फेरि अनुसन्धानको सुइ दिनेशतिरै तेर्सिएको बताएको छ।

त्यसपछि प्रहरीले रामविलास थारुको खोजी थाल्यो। उनको बैंक खातामा पनि ठूलै रकम कारोबार भएको देखिएको थियो। प्रहरी रामविलासको पछि लाग्यो। तर, उनी पनि भेटिएनन्। अन्ततः दिनेशमा नै आएर ठोकियो अनुसन्धान। अनुसन्धान गर्दै जाँदा दुवै खाताका असली मालिक त दिनेश नै रहेछन्। अरुको कागजपत्र र नामबाट एकाउन्ट खोलेर आफैंले चलाएको देखिन्छ। हामी थप अनुसन्धान गरिरहेका छौं,’ एसएसपी केसीले स्पष्ट पारेका छन्।

त्यसो त दिनेश पहिलोपटक पक्राउ परेका भने होइनन्। २०७८ माघमा राजस्व अनुसन्धान विभागले उनको परिवारलाई नै नियन्त्रणमा लिएको थियो। दिनेशको ग्लोबल आइएमई बैंकबाट ९ करोड ७९ लाखभन्दा बढी रकम कारोबार भएको देखिको थियो। त्यस्तै उनकी दिदी भगवती खड्काको एनआईसी एसिया बैंकमा रहेको खाताबाट २० करोड ४२ लाखको कारोबार भएको भेटिएको थियो। खड्काका बुबा नरबहादुरको ग्लोबल आइएमई बैंकबाट १ करोड ६४ लाख बराबरको कारोबार भएको देखिएको थियो।

प्रहरीले वानएक्स बेटमा कलाकारमाथि पनि अनुसन्धान थालेको छ। बिहीबारमात्र प्रहरीले कलाकार मरिचमान श्रेष्ठ ‘बल्छी धुर्वे’लाई नियन्त्रणमा लिएको छ। वानएक्सबेटमा विज्ञापन गरेको भन्दै प्रहरीले उनलाई सोधपुछ गरिरहेको छ। त्यस्तै, अन्य कलाकारमाथि पनि अनुसन्धान थालेको छ। प्रहरीले युट्युबरसहितआठ जना कलाकारलाई नियन्त्रणमा लिएर अनुसन्धान गरिरहेको छ। यस्ता केही अनलाइन बेटिङ कम्पनीले कलाकारको अनुमति नलिइ उनीहरुको नाम दुरुपयोगसमेत गरेको पाइएको छ।